Fyrir alla hunda

Grunnnámskeiðið er það námskeið sem er bæði fyrir hvolpa og eldri hunda. Mælum með að byrja sem fyrst með hvolpa eða fljótlega eftir fyrstu sprautuna.

Allar tegundir hafa gott af því að fara á námskeið hjá okkur, bæði smáhunda- og stórhundategundir. Allir hundar fá sitt rými til að vinna á með sínu fólki. Hundarnir fá ekki að heilsa eða leika við hvern annan nema allir vilja (*sjá nánar).

Kennt er með jákvæðum aðferðum sem byggjast á nýjustu rannsóknum um atferli hunda.

Til þess að fá afslátt af hundaleyfisgjöldum hjá þeim bæjarfélögum sem bjóða upp á slíkt þarf að hafa 80% mætingu og klára námskeiðið með bóklegu og verklegu prófi.

Í fyrsta verklega tíma er ekki leyfilegt að láta hunda þefa af hvor öðrum eða leika saman. Hvorki fyrir utan hundaskólann, inni í tíma eða eftir tímann fyrir utan. Þessi regla er til staðar til þess að vernda alla persónuleika sem koma á námskeið. Hundar eru mis-félagslyndir. Sumir geta verið hræddir og/eða vilja ekki heilsa öðrum hundum. Aðrir geta verið aðeins of félagslyndir og óvart hrætt aðra með æsingnum sem fylgir gleðinni.
Eftir merkjamáls fyrirlesturinn hefur eigandi lært á merkin og getur því byrjað að meta það hvernig persónuleika hans hundur er með, hvað hann vill og ekki vill.
Leiðbeinandi á námskeiðinu þarf smá tíma til þess að kynnast hundunum og meta það í samráði við eigenda hvað hundurinn hans vill.
Einnig er tekið tillit til tegundar og stærðar hundanna. Ekki allar tegundir passa saman í leik. Hundategundir leika mismunandi og því mikilvægt að velja rétta leikfélaga.
Það er samt mikilvægt að velja rétta leikfélaga. Það þarf að velja þær hundategundir sem passa þínum hundi, leika svipað. Það þarf einnig að passa að valinn sé félagi sem er öruggur með sjálfan sig og sýnir ekki árásagjarna- eða eineltishegðun. Einnig þarf að hafa í huga að of æstur/stressaður leikfélagi getur hrætt hundinn þinn. Mikilvægt er að kynna sér merkjamál hunda og stresseinkenni til þess að vita hvaða hundar eru góðir leikfélagar fyrir þinn hund.
Við getum sagt að hver hundur þarf að eignast nokkra (kannski um 10 hunda) leikfélaga strax frá því þú færð hann í hendur og leika oft, helst í hverri viku áður en hann verður kynþroska, þetta er til þess að byrja að kenna honum að ókunnugir hundar eru ekki hættulegir, heldur bara skemmtilegir.
Þetta á líka við smáhundategundir, og í raun mikilvægara að, sem dæmi Chihuahua, fái leikfélaga og þá að sjálfsögðu í sömu stærð strax í byrjun og hafi náð að þróa eðlileg samskipti við aðra hunda áður en þeir verða kynþroska sem gerist fljótt hjá þessari tegund eða í kringum 5-6 mánaða.
Þótt það sé mikilvægt að hundar eigi leikfélaga og fái að leika reglulega strax frá byrjun, þá er að róa niður og æfa slökun jafn mikilvægt. Það er auðvelt að slappa af heima þegar allt er eins og venjulega, en þegar það kemur leikfélagi í heimsókn eða þið úti að leika við annan hund þá getur verið erfitt fyrir hundana að slappa af.
Í stað þess að „leika, leika, leika“ þangað til þeir detta niður af þreytu, er sniðugt að leika smá og eftir það eru þeir teknir í slökun áður en þeir fá að leika aftur.
Slökunin getur verið þannig að hundurinn er í fangi eiganda eða á milli fótanna og eigandi heldur föstum tökum um axlir hundsins þannig að hann nær ekki að koma sér burt. Þvinguð hvíld svo að segja. Þegar hundarnir eru orðnir rólegir í þessari stöðu, þá fá þeir að fara að leika aftur. Þetta er svo endurtekið á kannski fimm mínútna fresti á meðan leik stendur. Eftir nokkur skipti fara hundarnir að læra að þeir þurfi að slappa af til þess að fá að halda áfram í leik. Þetta er mjög gott fyrir hundinn að læra sem ungur hvolpur því við getum við notað þetta í öðrum aðstæðum þar sem hann þarf að slappa af í áreiti. Sem dæmi á biðstofu hjá dýralækni, hundasýningar, námskeið, já eða bara í heimsókn hjá ömmu sem vill ekki svona æsing heima hjá sér.

Verð og næstu námskeið

Kvöld/helgarnámskeið: 45.000 kr.
Síðdegisnámskeið: 40.000 kr.
Verð innifelur klikker.

* Smellið á námskeiðin til að sjá tímayfirlit.

Staðsetning

Námskeiðin eru haldin við Skemmuveg 40 í Kópavogi (Bleik gata).

Eldri hundaeigandi sem hafði átt hunda alla tíð, sagði í lok námskeiðs: „Veistu, eftir þetta námskeið skil ég loksins af hverju gamli hundurinn minn var eins og hann var“.

Uppbygging námskeiðs

Á námskeiðinu lærir þú meðal annars

  • að lesa merkjamál hunda, hvernig þeir tjá sig við okkur og við aðra hunda. Hvað er eðlilegur leikur og hvað er það ekki.
  • að þekkja stresseinkenni, hvað stressar og hvernig þú getur komið í veg fyrir stress.
  • inn á hvernig hundar læra, hvernig þeir lesa okkur, sem sagt atferli hunda.
  • að vinna með hundinum þínum svo honum finnist skemmtilegast í heimi að vinna með þér.
  • hvernig þú styrkir jákvæða hegðun og hvernig þú kemur í veg fyrir óæskilega hegðun.
  • að nota klikker (innifalinn) sem þjálfunartæki og lærir að nota lokka, móta og grípa aðferðirnar.

Þú gætir hreinlega kynnst hundinum þínum upp á nýtt

Á námskeiðinu kennir þú hundinum þínum

  • að hlusta á fólkið sitt, bæði þig og aðra í fjölskyldunni sem vilja vera með og þjálfa hundinn.
  • að gera þessar grunnæfingar sem eru nauðsynlegar til að hversdagslífið verði þægilegt.
  • að slappa af í áreiti! Það er svo mikilvægt að hundurinn geti slappað af þó það sé gaman og þó það séu aðrir hundar nálægt honum.
  • að vera í áreiti og geta samt sem áður hlustað og gert æfingar.
  • að læra að læra, hundar sem hafa aldrei lært neitt þurfa sérstaklega að æfa heilann sinn í að læra, það er hægt að kenna gömlum hundi að sitja svo að segja.
  • að láta hluti vera eða bíða eftir lausnarorði. Sumt er alltaf bannað, það lærir hundurinn án þess að við þurfum stöðugt að segja bannorðið. Aðrir hlutir sem er meira óljóst hvort má eða ekki, þar lærir hann á bannorð.
  • að flaðra ekki upp á fólk.
  • að sýna kurteisishegðun við ýmislegt. Sem dæmi að í stað þess að væla/gelta/krafsa/glefsa eða haga sér á annan átt illa þegar hann „vill eitthvað“ þá lærir hann að vera rólegur og biðja fallega um „leyfi til að fá“.
  • að nota dót sem verðlaun og þá að geta gefið þér dótið þegar þú biður um það.
  • að labba fallega í taumgöngu.
  • að sjálfur koma inn við hæl og labba þar.

Bóka námskeið
















Staðfesta þarf námskeiðið með greiðslu við skráningu, ef það er er lengra en 3 vikur í að námskeið hefst er hægt að greiða staðfestingargjald 10.000kr og restin greiðist 7 dögum áður en námskeið hefst. Við pöntun hefur þú 48 klst eftir að þú færð greiðslu-tölvupóstinn til að ganga frá greiðslu (ef námskeiðið byrjar innan þann tíma þarf að greiða strax eða áður en námskeiðið hefst).

Hvolpanámskeið - Útsriftarhópur
Hvolpanámskeið - High five
Hvolpanámskeið - Chihuhahua á stól

Önnur námskeið

Merkjamál hunda er fyrir þig ef þig langar að kynna þér betur hvernig hundurinn þinn tjáir sig en finnst grunnnámskeið vera of stór pakki.Kynntu þér málið
Framhaldsnámskeið eru tilvalin fyrir þá sem eru með góðan grunn en vilja læra meira. Æfingarnar gagnast hvort heldur sem er í daglegu lífi eða í hlýðni. Hver vinnur á sínum hraða.Kynntu þér málið
Farið er í hugmyndafræði klikker þjálfunnar og hvernig við getum notað klikkerinn til að móta hegðun. Á námskeiðinu kennum við hundinum skemmtilegar kúnstir með klikkerþjálfun.Kynntu þér málið
Ef hundurinn þinn á erfitt með að umgangast aðra hunda eða fólk er grunnnámskeið kannski ekki fyrir þig. Á lífsleikninámskeiði HundaAkademíunnar er unnið í því að bæta félagsfærni hundsins.Kynntu þér málið